Úkraínski varnarmálaráðherrann skýrði frá því á Twitter á þriðjudaginn að her landsins hafi nú fengið nýtt flugskeytakerfi frá Frakklandi. Það bætist við önnur stórskotaliðsvopn sem Úkraínumenn hafa fengið frá Vesturlöndum.

Þessi vopn hafa breytt miklu varðandi gang stríðsins því þau hafa gert Úkraínumönnum kleift að ráðast á birgðaflutningalínur Rússa, bækistöðvar og birgðastöðvar langt að baki víglínunni.

Franska kerfið heitir LRU og er háþróað flugskeytakerfi. Áður höfðu Úkraínumenn fengið þrjú önnur slík kerfi, HIMARS, M270 og MARS II. LRU dregur 70 kílómetra.

Úkraínskir leiðtogar hafa beðið um fleiri langdræg vopn og loftvarnarkerfi til að styðja við árangur hersins á vígvellinum og til að geta komið í veg fyrir árásir Rússa.

Sébastien Lecorun, sem fer með málefni hersins innan frönsku ríkisstjórnarinnar, sagði fyrir um tveimur vikum að tvö LRU-kerfi yrðu send til Úkraínu. Hann sagði einnig að Frakkar muni senda Crotale loftvarnarkerfi til Úkraínu og að til standi að senda háþróuð ratsjárkerfi þangað.

Frakkar ætla einnig að taka við og þjálfa 2.000 úkraínska hermenn en ESB hefur lofað að sjá um þjálfun 15.000 úkraínskra hermanna.