Fyrr í haust tilkynnti Vladímír Pútín, Rússlandsforseti, um herkvaðningu allt að 300.000 manna. Henni lauk fyrir nokkru að sögn rússneskra yfirvalda sem segja að ekki sé fyrirhugað að grípa til frekari herkvaðningar.

Rússar hafa verið sakaðir um „leynda herkvaðningu“ því þeir eru sagðir hafa neytt refsifanga til að ganga til liðs við herinn og fara til Úkraínu til að berjast. Hefur þeim að sögn verið heitið fullri sakaruppgjöf ef þeir komast lifandi í gegnum sex mánuði í Úkraínu.

Hafa fregnir borist af því að morðingjar, nauðgarar og jafnvel mannæta hafi gengið til liðs við herinn og haldið til Úkraínu.

Mannfallið er sagt vera mjög mikið meðal fanganna því þeir eru að sögn notaðir sem fallbyssufóður á vígstöðvunum.