Úkraínski herinn hefur fengið góðar fréttir síðustu daga. Bandalagsríki Úkraínu hafa ákveðið að senda fullkominn loftvarnarkerfi til landsins í kjölfar harðra árása Rússa á borgir í landinu. Hafa þeir látið stýriflaugum og öðrum flugskeytum rigna yfir borgirnar.

Nú þegar er Iris-T SML loftvarnarkerfi frá Þýskalandi komið til Úkraínu en það er eitt fullkomnasta loftvarnarkerfið sem til er í dag að sögn Karsten Marrup, yfirmanns loftaðgerðadeildar danska varnarmálaskólans. Í samtali við TV2 sagði hann að kerfið sé byggt upp á ratsjá sem geti séð flugskeyti mjög langt í burtu, stjórnstöð með þremur skotpöllum sem hver og einn tekur átta eldflaugar sem draga allt að 40 kílómetra.

Þegar kerfið er notað þá ákveður stjórnandinn hvenær skotið er og hversu mörgum skotum er skotið.

Marrup sagði að í ljósi þess hversu stórt land Úkraína sé, þá skipti eitt svona kerfi ekki miklu máli en eftir því sem fleiri loftvarnarkerfi berist til landsins þá fari þau að skipta máli.

Þjóðverjar höfðu keypt kerfið fyrir sig sjálfa en hafa ákveðið að gefa Úkraínu það og þrjú að auki en þau verða afhent á næsta ári.

Hann sagði að Iris-T SML breyti ekki miklu í stríðinu þegar horft sé á heildarmyndina en kerfin muni skipta máli. Hann sagði að Úkraína hefði ekki getað staðið sig svo vel í stríðinu, sem raun ber vitni, nema vegna vopnasendinga frá Vesturlöndum: „Það er að sjálfsögðu höfuðverkur fyrir Pútín.“