Surovikin hefur setið í fangelsi tvisvar og er talinn bera ábyrgð á stríðsglæpum í Sýrlandi. Hann er sagður hrotti og gjörspilltur.
Flemming Splidsboel Hansen, sérfræðingur hjá Dansk Institut for Internationale Studier, sagði í samtali við Danska ríkisútvarpið að skipun Surovikin sé merki um að nú eigi að söðla um í Úkraínu. Nú eigi mjög harðar týpur að vera við stjórnvölinn.
Hann sagði að Surovikin eigi að koma á ró innan hersins, þar sem ringulreið ríki, og svo vilji menn hafa mann við stjórnvölinn sem sé slétt sama um almenning og innviði.
Mannréttindasamtökin Human Rights Watch hafa bent á Surovikin sem einn af þeim hershöfðingjum sem hjálpuðu stjórn Assad Sýrlandsforseta við að gera árásir á óbreytta borgara í Sýrlandi 2019 en þá var Surovikin yfirmaður rússneska heraflans þar í landi.
The Guardian segir að samkvæmt nýlegri greiningu breskra leyniþjónustumanna hafi komið fram að í rúmlega 30 ár hafi ferill hans einkennst af ásökunum um spillingu og grimmd.
Hann barðist í Sýrlandi, Afganistan og báðum stríðunum í Tjetjéníu og hefur að sögn oft særst. Hann hefur hlotið fjölda heiðursmerkja og hefur setið í fangelsi tvisvar.
1991 sat hann inni í sex mánuði eftir valdaránstilraun, sem er kennd við ágúst, gegn Mikhail Gorbatjov, forseta Sovétríkjanna, og 1995 fékk hann dóm fyrir ólöglega vopnasölu. Dómnum var síðar snúið við.
Í valdaránstilrauninni 1991 var hann kapteinn og yfirmaður skriðdrekadeildar sem var send út á götu í Moskvu til að reyna að halda aftur af almenningi sem barðist gegn valdaránstilrauninni. Margir hermenn neituðu að skjóta á mótmælendurna en Surovikin og hans menn óku í gegnum vegatálma og urðu þremur ungum mönnum, óbreyttum borgurum, að bana.
Í skýrslu frá bandarísku hugveitunni Jamestown Foundation segir að Surovikin hafi náð skjótum frama í rússneska hernum og sé þekktur fyrir „grimmd“. Hann hefur verið sakaður um að hafa lamið undirmenn sína og 2004 skaut ofursti sig á skrifstofu Surovikin eftir að hafa fengið holskeflu skamma yfir sig frá honum.
