Valeriy Zaluzhnyi, æðsti yfirmaður úkraínska hersins, segir hættu á að Rússar muni beita kjarnorkuvopnum í Úkraínu. Það muni hafa í för með sér hættu á „takmörkuðu“ kjarnorkustríði þar sem fleiri ríki dragast inn í átökin.

Þetta kemur fram í yfirlýsingu frá honum sem úkraínska ríkisfréttastofan Ukrinform birti.

Tilkynningin hefur vakið athygli því Zaluzhnyi tjáir sig mjög sjaldan í smáatriðum um stríðið.

The Guardian skýrir frá þessu og segir að hershöfðinginn hafi sagt að ef til þess kemur að Rússar taki skref í þá átt að beita kjarnorkuvopnum verði að svara því með öllum þeim ráðum sem heimsbyggðin hefur yfir að ráða.