Fullkominn mánudagsfiskur í sparifötum

Í upphafi nýrrar viku er ekkert betra en ljúffengur fiskur sem bragð er af. Hér er á ferðinni uppskrift af dásamlegum fiskrétti úr smiðju Berglindar Hreiðars matar- og ævintýrabloggara hjá Gotterí og gersemar, sem er í senn einfaldur og bragðgóður.

„Þessi fiskréttur sló í gegn hjá allri fjölskyldunni og er sannarlega lúxusútgáfa af hversdagsfiski. Á meðan fatið fer í ofninn er gott að sjóða grjón og leggja á borðið,“segir Berglind bættir við að þetta sé fiskréttur sem slær ekki síður í gegn hjá yngri kynslóðinni eins og þeirri eldri.

Fiskur í ofni með rjómasósu

Fyrir 4-6

900 g þorskur

1 stykki rauð paprika

½ blaðlaukur

1 stykki mexíkó kryddostur

500 ml rjómi

Rifinn pizzaostur eftir smekk

Salt og pipar

Ólífuolía til steikingar

1. Hitið ofninn í 190°C.
2. Skerið fiskinn niður og raðið í eldfast mót.
3. Skerið papriku og blaðlauk niður, steikið upp úr ólífuolíu þar til mýkist, saltið og piprið eftir smekk.
4. Hellið þá rjómanum yfir grænmetið og rífið mexíkóostinn, hrærið og hitið saman þar til osturinn er bráðinn.
5. Hellið yfir fiskinn í fatinu og setjið vel af rifnum pizzaosti yfir allt saman.
6. Bakið í 25 mínútur í ofninum.
7. Gott er að bera réttinn fram með soðnum hrísgrjónum eða kartöflum.