Héraðssaksóknari hefur ákært mann á fimmtugsaldri fyrir meiri háttar brot gegn skattalögum við rekstur tveggja fyrirtækja og fyrir peningaþvætti. Er maðurinn sagður hafa vanrækt að standa skil á staðgreiðsluskilagreinum einkahlutafélags um nokkurra mánaða skil á tímabilinu 2017 til 2019. Samanlagt eru svikin þar sögð nema um sjö og hálfri milljón.
Þá er hann jafnframt sagður hafa vanrækt að standa skil á innheimtum virðisaukaskatti við rekstur þess sama fyrirtækis sem nam samkvæmt áætlunum Skattsins tæpum 14 milljónum á árunum 2017 og 2018.
Úr ákærunni má lesa að árið 2019 hafi maðurinn snúið sér að öðru fyrirtæki en haft uppi sama háttalag, þ.e. að skila ekki inn virðisauka- og staðgreiðsluskilagreinum samkvæmt reglum þar um.
Árið 2019 er hann sagður hafa vanrækt að greiða samtals 1,4 milljón í staðgreiðsluskatt til hins opinbera og aðrar 13 milljónir í innheimtan virðisaukaskatt.
Samanlagt námu þannig meint skattsvik mannsins samkvæmt ákærunni rúmum 35 milljónum.
Málið var þingfest nú í nýliðinni viku og er til meðferðar fyrir Héraðsdómi Reykjaness.
