Tómas bendir á að í þeirri snúnu fimmtu bylgju faraldursins, sem við glímum við núna, hafi oft verið kallað eftir fyrirsjáanleika, ekki síst frá samtökum atvinnulífsins og sumum stjórnmálamönnum. Hann nefnir í því samhengi nýlegt ákall Áslaugar Örnu og Þórdísar Kolbrúnar um afnám sóttvarnaaðgerða hér á landi.
„Ráðagóður Þórólfur fékk ómaklega gagnrýni, en hann, líkt og og undirritaður, vöruðu við afléttingum, ekki síst með viðkvæma stöðu Landspítala í huga. Til allrar hamingju voru landamæri okkar ekki opnuð upp á gátt, en því miður var látið undan miklum þrýstingi ýmissa hagsmunaaðila og öðrum takmörkunum aflétt of hratt. Afleiðingarnar blasa nú við í sögulega hárri tíðni Covid-sýkinga,“ segir Tómas.
Hann bendir síðan á að enn einu sinni sé hættustig á Landspítalanum, gjörgæsludeildirnar fullar upp í rjáfur og staðan á smitsjúkdómadeilinni mjög þung sem og á lungnadeildinni og að hún þyngist daglega. „Sama þróun hefur orðið í fyrirmyndarlöndunum Danmörku og Noregi, sem í skyndi hafa innleitt Covid-takmarkanir,“ segir hann síðan.
„Afleiðing hárrar smittíðni hér á landi endurspeglast í þeirri staðreynd að önnur ríki vara nú þegna sína við ferðalögum til Íslands. Er þetta fyrirsjáanleikinn sem ferðaþjónustan og samtök atvinnurekanda voru að auglýsa eftir, og það frá sjálfum ráðherra málaflokksins? Orðum fylgir ábyrgð,“ segir hann og víkur síðan að ráðherrunum tveimur og segir: „Það verður að teljast skrítið að ráðherrar skuli stíga fram undir formerkjum einstaklingsfrelsis og afnema takmarkanir sem eru nauðsynlegar og settar á með mannúð og hagsmuni heildarinnar að leiðarljósi. Skoðanaskipti eiga vissulega rétt á sér, en ráðherrar verða að gæta orða sinna og varast að berja í falskar pólitískar bumbur. Skynsemi er nefnilega merkilega fyrirsjáanleg.“
