Landsréttur staðfesti í dag dóm héraðsdóms og neitaði konu sem sakað hefur eiginmann sinn um ofbeldi um lögskilnað, sem og skilnað að borði og sæng, sem var varakrafa konunnar.
Konan byggði kröfu sína um lögskilnað á því að maðurinn hefði beitt hana ofbeldi. Maðurinn hafnaði því að hafa beitt konuna ofbeldi og benti á að hún hefði ekki lagt fram sannanir fyrir fullyrðingum sínum, ekki vísað til lögregluskýrslna, ákæru, dóms eða annars sem sýni fram á að hann hafi beitt hana ofbeldi.
Samkvæmt fyrstu málsgrein 40. greinar hjúskaparlaga getur annað hjóna krafist lögskilnaðar hafi hitt orðið uppvíst að líkamsárás eða kynferðisbroti sem bitnar á makanum eða barni sem býr á heimilinu. „Af hálfu stefnanda hafa ekki verið lögð fram gögn þessu til stuðnings önnur en ljósmyndir sem hún kveður vera af áverkum sínum, en óljóst er hvenær þær voru teknar,“ segir í niðurstöðu Héraðdóms í málinu. Var niðurstaðan sú að hafna kröfu konunnar um lögskilnað, sem og varakröfunni um skilnað að borði og sæng.
Landsréttur var sama sinnis og úrskurðaði í dag, föstudaginn 4. júní, að dómur héraðsdóms skuli vera óraskaður. Konan losnar því ekki úr hjónabandinu.
Dóma héraðsdóms og Landsréttar í málinu má lesa hér