Ný stjórn var kjörin á aðalfundi Húseigendafélagsins á dögunum. Sigurður Helgi Guðjónsson gaf ekki kost á sér til setu í stjórn félagsins, en hann hafði verið stjórnarmaður og framkvæmdastjóri Húseigendafélagsins með hléum allt frá árinu 1977. Hildur Ýr Viðarsdóttir hefur tekið við af honum sem formaður stjórnar. Hildur Ýr er hæstaréttarlögmaður og einn eigenda lögmannsstofunnar Landslaga.

Þá komu ný inn í stjórn félagsins Sæunn Björk Þorkelsdóttir, Andrea Sigurðardóttir og Sigmundur Grétar Hermannsson. Gestur Óskar Magnússon situr áfram í stjórn en hann var kjörinn til tveggja ára á síðasta ári.

Sæunn starfar sem VP innkaupastýringar hjá Controlant en hafði áður verið forstöðumaður innkaupastýringar og kostnaðareftirlits hjá Eimskip.

Andrea er blaðamaður á Morgunblaðinu og hefur víðtæka reynslu úr atvinnulífinu, síðast sem verkefnastjóri í samskiptum hjá Marel.

Sigmundur Grétar er húsasmíðameistari og eigandi Fagmats, en fyrirtækið sérhæfir sig í ástandsskoðun og rakamælingum fasteigna og faglegri ráðgjöf því viðvíkjandi.

Þá hefur Sigurður Orri Hafþórsson tekið við sem framkvæmdastjóri félagsins. Sigurður hefur starfað hjá Húseigendafélaginu frá árinu 2019 sem lögfræðingur og síðar lögmaður.

Húseigendafélagið eru hagsmunasamtök húseigenda á Íslandi og hafa starfað óslitið frá árinu 1923. Félagsmenn eru um tíu þúsund og hefur farið jafnt og þétt fjölgandi undanfarna áratugi. Mest hefur fjölgunin verið meðal húsfélaga í fjöleignarhúsum en í félaginu eru nú tæplega 800 húsfélög.