Karlmaður fæddur árið 1992 hefur verið sakfelldur fyrir líkamsárás sem átti sér stað á bílastæði fyrir utan veitingastaðinn Rósakaffi við Breiðumörk í Hveragerði, þann 7. desember árið 2019.
Maðurinn veittist þar að ungri konu og sló hana í andlit þannig að hún féll í jörðina. Í kjölfarið elti hann hana á hlaupum yfir nærliggjandi umferðargötu og kýldi hana þar aftur í andlitið svo hún féll í jörðu. Konan hlaut af þessu bólgur, roða og eymsli yfir báðum kinnbeinum.
Eftir atvikið hótaði hann konunni lífláti og var hann líka ákærður fyrir hótanirnar.
Málavöxtum er lýst svo í texta dómsins:
„Laugardaginn 7. desember 2019 kl. 02:29 barst lögreglu tilkynning um slagsmál fyrir utan Ölverk í Hveragerði og var talið að ákærði hefði ráðist á A, brotaþola í máli þessu. Þegar lögreglumenn komu á vettvang var ákærði kominn heim til sín, en lögreglumenn ræddu við brotaþola og nokkur önnur vitni á vettvangi. Haft var eftir brotaþola að hún hafi verið á Rósakaffi og þegar loka hafi átt staðnum hafi hún farið út. Hafi hún séð æstan strák fyrir utan og spurt hann af hverju hann væri svona pirraður. Hafi hann þá sagt að hann væri ekkert pirraður út í hana en í kjölfarið hafi hann kýlt hana með krepptum hnefa ítrekað í andlitið með þeim afleiðingum að hún hafi dottið. Hún hafi staðið upp og ákveðið að taka mynd af stráknum sem hún kvað heita XXXX. Hafi hann þá veist að henni og kýlt hana ítrekað í andlitið. Hún hafi þá hlaupið inn í Securitas bifreið og beðið ökumanninn um að læsa bifreiðinni. Þá hafi þessi XXXX komið, opnað afturhurðina en ekki komist inn þar sem hann hafi verið dreginn í burtu. Hafi hann þá kallað til hennar að ef hún kærði hann kæmi hann heim til hennar og dræpi hana.“
Dómur í málinu var kveðinn upp í Héraðsdómi Suðurlands miðvikudaginn 12. maí. Maðurinn var fundinn sekur og dæmdur 60 daga skilorðsbundið fangelsi. Hann þarf að greiða 300.000 í miskabætur og sakarkostnað sem er vel á aðra milljón króna.