Morgunblaðið skýrir frá þessu í dag. Eins og margir urðu varir við í gær þá reið skjálfti af stærðinni 5,4 yfir en hann átti upptök sín skammt frá Fagradalsfjalli. Þetta var næststærsti skjálftinn í yfirstandandi hrinu sem hófst í febrúar.
Morgunblaðið hefur eftir Halldóri Geirssyni, dósent í jarðeðlisfræði við Háskóla Íslands, að allar líkur séu á að eldgos myndi losa um spennuna sem hefur valdið jarðskjálftunum á Reykjanesskaga að undanförnu. Páll Einarsson, prófessor emiritus við Háskóla Íslands og jarðeðlisfræðingur, tók undir þetta. Hefur Morgunblaðið eftir þeim báðum að þeir telji líklegt að skjálftahrinan endi með godi, fyrr eða síðar, og að þá muni jörð hætta að skjálfa eins mikið og undanfarið. „Það er líka alveg mögulegt að hún hjaðni þessi virkni og það gjósi bara ekkert í tugi ára. En þessar eldstöðvar hafa verið þarna í milljónir ára og það verður nú að teljast ólíklegt að þær fari eitthvað að hætta núna. Það gýs þarna fyrir rest,“ er haft eftir Halldóri.
Hann sagði að gos muni binda enda á skjálftahrinuna nema kvikuinnskot verði annars staðar á svæðinu. Síðasta árið hafa jarðvísindamenn orðið varir við fjögur kvikuinnskot, að því að talið er, á skaganum. Halldór sagði að kvikugangurinn milli Fagradalsfjalls og Keilis sé langstærstur. Hann sagði að hin þrjú væru við eldstöðina í Svartsengi, í Reykjaneskerfinu sem er vestast á Reykjanesskaga, og í eldstöðinni í Krýsuvík. „En þessar hreyfingar við Fagradalsfjall eru langtum stærri en þessar hreyfingar þannig að við erum að velta fyrir okkur hvort það sé hreinlega einhver inngjöf af kviku undir skaganum öllum,“ sagði hann.
Halldór og Páll eru sammála um að erfitt geti reynst að læra af sögunni á skaganum því þar hafi ekki gosið í 800 ár og að gosefni þekji svæðið og því sé erfitt að skoða jarðlög. Nú verði að treysta á gögn úr GPS-mælingum og á gervihnattarmyndir.
