Ítrekað var tilkynnt um samkvæmishávaða í Grafarvogi í nótt. Um var að ræða samkvæmi þar sem gestir voru flestir á aldrinum 16 til 18 ára samkvæmt lögreglu. Þá segir lögreglan að óboðnir gestir séu sagðir hafa ruðst inn og barið frá sér í samkvæminu. Grunur er á að líkamsárás, húsbrot og brot á vopnalögum hafi átt sér stað í samkvæminu.
Þetta var á meðal þess sem lögreglan greindi frá í dagbók lögreglu sem send var út í morgun. Í dagbókinni var einnig mikið um stöðvanir á bifreiðum. Til að mynda var ein bifreið stöðvuð í 108 Reykjavík þar sem ökumaðurinn var tiltölulega nýkominn með bílpróf en var grunaður um að hafa ekið bifreiðinni undir áhrifum fíkniefna. „Að lokinni sýnatöku var ökumanninum ekið heim,“ segir lögreglan en tilkynning um málið var send til Barnaverndar.
Þá var sami maðurinn tekinn tvisvar í nótt vegna gruns um þjófnað á matvöru. Fyrst hafði lögreglan afskipti af manninum klukkan 21:40 í gærkvöldi en þá var maðurinn grunaður um þjófnað á matvöru í 101 Reykjavík. Maðurinn var síðan aftur tekinn fyrir þjófnað á matvöru í 108 Reykjavík um þrjú leytið í nótt. Var maðurinn þá grunaður um að hafa hnuplað tveimur pokum af humri.
Klukkan 19:20 þurfti lögreglan að hafa afskipti af pari á heimili sínu í 203 Kópavogi. Mikil fíkniefnalykt var frá íbúðinni og er parið grunað um vörslu og/eða ræktun á fíkniefnum. „Plöntur, tilbúið efni og búnaður var handlagður af lögreglu en af lokinni skýrslutöku var vettvangurinn yfirgefinn.
