Tveir ofurölvi menn á vappinu með Bónus innkaupakerru í Keflavík vöktu fyrr í vikunni athygli vegfaranda sem gerði lögreglunni á Suðurnesjum viðvart.
Kerran reyndist innihalda mikið magn af þýfi úr tveimur verslunum sem annar mannanna hafði tekið ófrjálsri hendi. Um var að ræða þráðlausan hátalara, ilmvötn og ýmis konar matvöru úr Bónus að heildarverðmæti tæplega 50 þúsund krónur.
Annar mannanna viðurkenndi þjófnaðinn við skýrslutöku hjá lögreglu.
Ofangreint kemur fram í tilkynningu frá Lögreglunni á Suðurnesjum.
Þar kemur einnig fram að umferðaróhapp hafi orðið í vikunni er maður hjólaði yfir hringtorg og lenti á bifreið. Kvartaði hann í kjölfarið undan eymslum og var fluttur á heilbrigðisstofnun til aðhlynningar. Lögreglu grunaði að maðurinn væri undir áhrifum fíkniefna og við sýnatöku kom í ljós að svo var, en í manninum mældist kannabis.
Þá óku tveir ökumenn á ljósastaur og umferðarljós. Annar þeirra hafði sofnað undir stýri.
Lögregla hafði einnig afskipti af tveimur drengjum sem voru saman á einni rafskútu. Hvorugur var með hjálm. Lögregla hafði samband við forráðamenn og tilkynnti málið til barnaverndar.