Samninganefndir Flugfreyjufélags Íslands og Icelandair funda hjá Ríkissáttasemjara í dag kl. 13, annan daginn í röð. Aðilar funduðu í gær í fyrsta skipti síðan 20. maí en þá höfnuðu flugfreyjur því sem Icelandair kallaði „lokatilboð“.
Staðan í viðræðunum er óljós en mikið ber á milli samkvæmt ummælum Guðlaugar Líney Jóhannsdóttur, formanns FFÍ, við Vísi í gær. Hún ítrekaði þar ríkan samningsvilja félagsins.
Ásdís Pétursdóttir, upplýsingafulltrúi Icelandair, sagði í samtali við DV að í raun væri ekki hægt að segja neitt um viðræðurnar annað en að aðilar væru að tala saman.
Ljóst er að viðræðurnar eru á viðkvæmu stigi en ef til vill skýrast línur eftir fundinn í dag.