Líkt og fjölmiðlar hafa greint frá þá er mikill eldur í húsi á horni Vesturgötu og Bræðraborgarstígs. Samkvæmt heimildum DV hafði lögregla afskipti af fólki í húsinu í gærkvöldi. Einnig leikur grunur á að fíkniefni hafi verið í húsinu. Húsið hafði orð á sér sem aðstaða fíkla, auk þess sem óreglulegur gestagangur var tíður.
Samkvæmt heimildum DV þá hafa einnig viðbragðsaðilar á vettvangi lýst yfir áhyggjum af því að fleiri hafi verið inni í húsinu en hafi komist út. Jón Viðar Matthíasson, slökkviliðsstjóri sagði við Rás 2 um fjögurleytið að óvíst væri hvort að einhverjir væru enn inni. Sú staða gæti þó skýrst á hverri stundu. Þá hafa reykkafarar þegar farið nokkrar ferðir um húsið og eru þeir enn að störfum samkvæmt heimildum DV.
Einhverjir voru handteknir á staðnum. Jón Viðar sagði í samtali við DV að það fólk hefði verið að fara inn og út að sækja muni úr húsinu. Hann sagði að lögregla hefði handtekið fólkið til að ná betri stjórn á aðstæðum.
Íbúar í nærliggjandi húsum hafa verið hvattir til að loka gluggum, en mikill reykur leggur frá brunanum. Hefur reykjarlykt fundist í mikilli fjarlægð frá eldinum. Stórt starfslið slökkviliðs, sjúkraliðs, lögreglu og sérsveitar hefur verið á vettvangi.