Í seinasta tölublaði DV birtist viðtal við Amöndu Marie, þríþrautarkonu og einkaþjálfara. Í viðtalinu lýsti hún upplifun sinni af Þríþrautarsambandi Íslands og dómsmálinu sem hún höfðar gegn sambandinu.
Amanda hefur farið fram á að Þríþrautarsambandið greiði henni 1,5 milljónir í skaðabætur, auk málskostnaðar. Hún sakar stjórn félagsins um einelti og mismunun. Sambandið synjaði á seinasta ári beiðni hennar um að keppa á vegum þess í svokallaðri elite-þríþrautarkeppni sem fram átti að fara fram í Kirgistan. Henni var hafnað á grundvelli þess að hún hafi ekki náð meintum lágmarkstímum í íþróttinni.
Amanda sagði að tímar þessir væru óljósir og ruglingslegir og að sömu kröfur hefðu ekki verið settar á annað íþróttafólk.
DV hefur nú borist svar frá stjórn Þríþrautarsambandsins vegna málsins, en í því segir eftirfarandi:
„Eins og lýst er í viðtalinu hefur deila staðið á milli Amöndu Marie Ágústsdóttur og Þríþrautarsambands Íslands sem hefur leitt til þess að Amanda hefur höfðað dómsmál á hendur Þríþrautarsambandinu. Deilan hefur grundvallast á kröfum Amöndu um að fá að keppa fyrir Íslands hönd í svokölluðum „elite“-þríþrautarkeppnum, án þess að hafa staðist þau viðmið Afreksstefnu Þríþrautarsambandsins sem íþróttamenn í flokki fullorðinna þurfa að uppfylla, fyrir skráningu í slíkar keppnir.
Stjórn Þríþrautsambands Íslands hafnar því alfarið að Amanda Marie hafi sætt mismunun eða meingerð af hálfu stjórnar Þríþrautarsambands Íslands eða að sambandið hafi á annan hátt brotið lög eða reglur gagnvart henni. Fjallað hefur verið um deiluna á vettvangi dómstóls Íþrótta-og Ólympíusambands Íslands (ÍSÍ) og áfrýjunardómstóls ÍSÍ, en dómarnir eru birtir og aðgengilegir á heimasíðu á vef ÍSÍ. Niðurstaða beggja dómstiga var að vísa sumum kröfum Amöndu frá dómi en hafna öðrum.“
Þá segir einnig í svarinu að Þríþrautarsambandið muni ekki reka málið í fjölmiðlum þar sem það sé til umfjöllunar hjá Héraðsdómi Reykjavíkur.