Ungur maður varð fyrir líkamsárás í Kópavogi á níunda tímanum í gærkvöldi, að sögn lögreglu. Maðurinn sagði að tveir strákar hefðu ráðist á hann og fann hann til eymsla í andliti og var auk þess með kúlu á hnakkanu. Árásarmennirnir voru farnir af vettvangi þegar lögreglu bar að garði og fundust þeir ekki.
Nokkrir ökumenn voru teknir úr umferð í gærkvöldi og í nótt. Tveir eru grunaðir um akstur undir áhrifum fíkniefna og þá var einn sem ók ótryggðri bifreið. Voru skráningarnúmer bifreiðarinnar klippt af. Þá var tilkynnt um þrjú innbrot. Brotist var inn í bifreiðar við Miðbakka og við Flugvallarveg og verðmætum stolið. Loks var tilkynnt um eitt innbrot í skóla í Hlíðahverfi.