Svo virðist sem Fálkaorða hafi verið boðin til sölu á Brask og brall Facebooksíðunni í kvöld. Spruttu upp talsverðar umræður um ólögmæti þess í kjölfarið, enda sala hennar ólögleg. Höfðu rúmlega 80 manns látið skoðun sína í ljós á aðeins 40 mínútum.

Fálkaorður eru eign íslenska ríkisins og orðuhöfum veitt orðan til þess að bera á meðan þeir eru á lífi. Við andlát orðuhafa ber að skila henni til íslenska ríkisins. Augljós brestur hefur verið á þessu í gegnum árin. Sambærileg mál komu upp árin 2007, 2011 og 2015. Sagði Örnólfur Thorsson forsetaritari við eitt tilefnið að slíkt væri stranglega bannað. „Það er ljóst mál að það má ekki selja fálkaorður.“ Þó er ljóst að blómlegur markaður er fyrir orðurnar. Kom til dæmis á daginn að sá sem auglýsti orðuna til sölu árið 2007 var safnari í Vancouver og átti hann heilar níu íslenskar Fálkaorður til sölu í viðbót.

Þessi sem nú er auglýst á Facebook fæst, að því er virðist, fyrir 100 þúsund krónur. Ekki náðist samband við seljandann þrátt fyrir ítrekaðar tilraunir.

Uppfært 23:59: Auglýsingin var fjarlægð af Facebook og er nú hvergi sjáanleg.