„Mig minnir að það hafi ekki verið gefnar upp neinar forsendur fyrir ákvörðuninni. Þessir skiptastjórar virðast vera einráðir. Annars hef ég ekki vit á þessum málum og læt lögfræðinginn minn um þetta,“ segir Stefán Eysteinn Sigurðsson, fyrrverandi fjármálastjóri WOW air. Hann hefur höfðað mál á hendur þrotabúi WOW air sem tekið verður fyrir í Héraðsdómi Reykjavíkur á morgun.
„Þeir höfnuðu launakröfunni en mér skilst að það sé venja hjá skiptastjórum að hafna launakröfum hjá fjármálastjóra og forstjóra,“ segir Stefán. Hann er rólegur yfir málinu og ætlar ekki að mæta í fyrirtökuna en þar leggja málsaðilar fram greinargerðir. Málflutningur í málinu verður síðar. „Ég á ekki von á þurfa að mæta fyrir dóm vegna málsins fyrr en í vor,“ segir hann.
Stefán segist hafa unnið sjálfstætt síðan WOW air varð gjaldþrota í mars 2019 en hann var ráðinn fjármálastjóri félagsins árið 2015. „Ég þurfti aðeins að hvíla mig eftir þennan hasar sem varð og hef bara verið að taka að mér verkefni. Hef verið að vinna fyrir flugfélög erlendis og það er bara fínt.“
Málið verður tekið fyrir í Héraðsdómi Reykjavíkur í fyrramálið.