Fréttablaðið skýrir frá þessu í dag. Fram kemur að rannsókn málsins hafi hafist fyrir rúmlega tveimur árum. Í október 2018 ræddi Fréttablaðið við Sigrúnu Jóhannsdóttur lögmann og réttargæslumann nokkurra kvenna sem höfðu lagt fram kærur á hendur manninum.
Í kjölfar umfjöllunar Fréttablaðsins bættust fleiri konur í hópinn að sögn Sigrúnar og leituðu á þriðja tug kvenna til hennar vegna meintra kynferðisbrota mannsins. Fréttablaðið segist hafa heimildir fyrir að á annan tug kvenna hafi kært manninn til lögreglu fyrir kynferðisbrot.
Nú hefur rannsókn á fjórum þeirra leitt til ákæru fyrir nauðgun.
Tveir dómkvaddir sjúkranuddarar voru fengnir til að meta hvort og þá að hvaða marki háttsemi mannsins samræmist viðurkenndum aðferðum í nuddfræðum. Fréttablaðið segir að í skýrslum, sem teknar voru af sumum kvennanna, hafi komið fram að maðurinn hafi í sumum tilfellum meðhöndlað stoðkerfisvanda þeirra í gegnum leggöng þeirra, óháð hvar í líkamanum þær kenndu sér meins.
Blaðið segir að deilt sé um gildi matsgerðar sjúkranuddarana og hafi verjandi ákærða mótmælt henni, meðal annars á þeim grundvelli að skjólstæðingur hans sé ekki sjúkranuddari og hafi ekki selt þjónustu sína sem sjúkranudd.