Svo virðist vera að mikið hafi gengið á hjá lögreglu í nótt.

Þegar að klukkan var að ganga tíu í gærkvöldi féll maður af leigurafskútu í miðbænum. Hann er sagður hafa slegið höfðinu í gangstétt og misst meðvitund. Lögregla kom á vettvang og þá var maðurinn „illa áttaður“, auk þess sem hann var grunaður um ölvunarakstur. Þetta kemur fram í dagbók lögreglu.

Maðurinn var fluttur á bráðadeild. Við nánari skoðun á rafskútunni kom í ljós að hún var nánast bremsulaust. Hjólið var því haldlagt af lögreglu og tekið úr umferð, en líkt og áður kom fram var um leiguhjól að ræða.

Þá virðist mikið hafa verið um akstur undir áhrifum áfengis og vímuefna.