Ungur piltur er sagður hafa gengið berserksgang í Árbænum í gærkvöldi en Fréttablaðið fullyrðir að hann hafi elt hóp af börnum með hníf og ógnað þeim. Elsa Margrét Víðisdóttir, íbúi í Árbæ, segir frá þessu á Facebook síðu fyrir íbúa í Árbænum. Hún segir að pilturinn hafi elt syni hennar um hverfið, allt frá Árbæjarskóla að Höfða.
„Strákur í annarlegu ástandi elti syni mína og fleiri hér í Árbæ fyrr í kvöld, hann var með hníf og ógnaði þeim, þeir létu lögreglu vita og síðast þegar ég vissi var lögregla að leita hans. Synir mínir földu sig hér og þar þangað til hjálpin kom,“ skrifar Elsa.
Elsa þakkar starfsmanni bílaþjónustunnar Kvikk sérstaklega en synir hennar fengu að fela sig þar. „Ég er þakklát starfsmanni í Kvikk að leyfa þeim að bíða þar. Þetta er ekki í fyrsta sinn sem aðili í annarlegu ástandi ógnar börnum hér í hverfinu. Vonandi fer lögregla að ná utan um þennan lið sem virðist vera hér í hverfinu,“ segir Elsa.