Erna Ýr Öldudóttir, blaðamaður á Viljanum, er þekkt fyrir umdeildar skoðanir. Á Facebook-síðu sinni hjólar hún nú í MeToo-hreyfinguna og segir hana hafa skemmt tilhugalíf fólks.
„MeToo hefur gert mörgum lífið leitt í tilhugalífinu. Franskur sjónvarpsmaður missti starfið og æruna fyrir það eitt að stíga í vænginn við konu í kokteilpartýi. En franskur dómstóll hefur úrskurðað um að fólki sé eðlilegt að fara á fjörurnar við annað fólk,“ skrifar Erna Ýr og deilir frétt af Viljanum sem fjallar um að Sandra Muller, ein lykilkona í MeToo-hreyfingunni í Frakklandi hafi verið dæmd til að greiða bætur fyrir falskar ásakanir.
Í athugasemd við færsluna bætir hún við þetta og segir: „Þegar MeToo brjálæðið stóð sem hæst, heyrði ég ungar konur sem biðu í röð á undan mér á leiðinni á barinn, kvarta yfir að það væri orðið tilgangslaust setja á sig ilmvatn, fara í rósóttu nærbuxurnar og fara í bæinn, þar sem enginn þyrði að klípa í þær lengur,“ skrifar Erna Ýr.
Gústaf Níelsson, sagnfræðingur sem hefur verið viðloðandi stjórnmál og er þekktur fyrir umdeildar skoðanir, fagnar þessum dómi í Frakklandi. „Það hlaut að koma að því að dómstóll kæmist að „náttúrulegri“ niðurstöðu,“ skrifar hann.