Símon Sigurmonsson er látinn. Hann var 85 ára. Símon var sannkallaður brautryðjandi í ferðaþjónustu á Íslandi en hann hóf uppbyggingu og rekstur Gistihússins Langaholts árið 1977. Hann var enn fremur einn stofnaðila í Ferðaþjónustu bænda.
Skessuhorn greinir frá andláti Símonar. „Símon var fæddur í Einarsnesi í Borgarhreppi, sonur hjónanna Sigurmons Símonarsonar og Jórunnar Helgadóttur. Hann bjó um tíma á Akranesi en fluttist þá á Snæfellsnes. Símon og Svava Guðmundsdóttir eiginkona hans voru brautryðjendur í ferðaþjónustu bænda á Vesturlandi, hófu árið 1977 uppbyggingu og rekstur Gistihússins Langaholts. Þau voru meðal stofnaðila í Ferðaþjónustu bænda á níunda áratugnum, handhafar hlutabréfs númer tvö í fyrirtækinu,“ segir í minningargrein Skessuhorns.
Að lokum seldu þau gistihúsið til sonar þeirra. „Fljótlega eftir að þau hófu rekstur gistiheimilis og matsölu hættu þau hefðbundnum búskap á jörð sinni. Í Görðum er nú hin myndarlegasta aðstaða fyrir ferðafólk í gistingu og mat. Á þessum fallega stað í Staðarsveit geta gestir notið náttúrunnar, með Snæfellsjökulinn blasandi við í allri sinni dýrð, strönd Faxaflóa og fjallgarðinn. Símon og Svava seldu Gistihúsið Langaholt til sonar síns Þorkels og Rúnu konu hans. Hafa þau á undanförnum árum búið í Borgarnesi en slitu þó aldrei tengslin við Garða og hafa dvalið þar á sumrin til aðstoðar yfir háönn ferðatímabilsins,“ segir í minningargrein Skessuhorns.