Vilmundur Hansen, faðir drengsins tjáði sig um málið á Facebook síðu sinni í kjölfar málsins.
„Fyrstu viðbrögð skólans (og við eru að tala um sérdeild fyrir fötluð börn) eru að reka hann úr skólanum.“
Ástæðan fyrir brottrekstrinum var sú að deildin henti honum ekki og að börnin þar væru viðkvæm. Þessi börn sem sögð voru vera viðkvæm eru í mörgum tilfellum sömu börn og drengurinn hafði verið með í Klettaskóla í tíu ár.
„Ég verð að segja að sérdeildin í Ármúla fellur gríðarlega í áliti hjá mér við svona framkomu. Hvaða skóli vísar fötluðu barni úr skóla á öðrum degi?“
Magnús Ingvason, skólameistari Fjölbrautaskólans við Ármúla, sagði í samtali við DV að ekki hafi verið um brottrekstur að ræða.
„Það er verið að leita að úrræðum fyrir hann en ég má náttúrulega ekki vera að ræða neitt um einstaka nemendur. Þetta er bara allt í skoðun.“
Magnús þvertók fyrir að drengnum hafi verið vísað úr skólanum.
„Það er ekki búið að reka neinn úr skólanum“
Vilmundur birti nýja færslu í dag þar sem hann segir ekkert hafa breyst varðandi mál sonar sína. Í dag eru liðnir fimm skóladagar og drengurinn hefur ekki fengið að vera í skólanum í þrjá daga af þessum fimm.
„Ekkert hefur komið fram sem bendir til að hann megi mæta á mánudaginn.“
Hann segir skólastjórann klifa á því að drengnum hafi ekki verið vikið úr skólanum til að rættlæta gjörðir skólans.
„Ég spyr þá af hverju fær hann ekki að mæta í skólann eins og hann á rétt á samkvæmt lögum?“
Vilmundur segist ekki hafa heyrt um aðra eins framkomu við nokkurn ungling.
„Það hlýtur að vera Íslandsmet að vera vísað úr sérdeild skóla á öðrum degi án þess að gerðar hafi verið nokkrar tilraunir til aðlögunar eða að þiggja liðveisluna sem er í boði.“
Hann segir uppgjöf skólans vera algert og til minnkunar á allan hátt, málið sé komið í ferli hjá Réttargæslumanni fatlaðra.
„Vonandi mun það hafa jákvæð áhrif.“