Forseti Filippseyja, Rodrigo Duterte, hefur gagnrýnt Ísland harðlega fyrir að ljá beiðni Sameinuðu Þjóðanna, um að staða mannréttinda í Filippseyjum verði tekin til rannsóknar, stuðning sinn.
Hann telur Íslendinga skorta skilning á þeim vandamálum sem Filippseyingar glíma við.
„Það er vandinn ykkar. Þið hafið of mikinn ís og það er ekki skýr munur á nóttu og degi hjá ykkur. Þú skiljið ekki glæpi, það er enginn lögreglumaður heldur og þið borðið bara ís.“
Duterte hefur hafnað beiðninni sem var studd af 18 ríkjum. Talsmaður forsetans, Salvador Panelo segir að með beiðninni sé markmiðið að koma illa við Filippseyinga.
Mannréttindahópar halda því fram að þúsundir manna hafi látið lífið í fíkniefnastríði Filippseyskra stjórnvalda. Lögreglan þar í landi heldur því fram að um 6 þúsund manns hafi látið lífið frá því að Duterte tók við forsetaembættinu árið 2016.
Ríkisstjórn Duterte hefur þvertekið fyrir það að lögregla taki fíkniefnasala af lífi. Grunaðir fíkniefnasalar sem létu lífið í lögregluaðgerðum hefðu í öllum tilvikum veitt lögreglu viðnám.
