Grunur um að sprengja væri í farangri farþega á Keflavíkurflugvelli vaknaði við hefðbundið eftirlit á farangri í lest í dag. „Hluturinn líktist óhugnanlega mikið sprengju,“ segir Jón Þór Karlsson, yfirvarðsstjóri flugstöðvardeildar löreglunnar á Suðurnesjum. Ekki reyndist um sprengju að ræða heldur eðlilegan hlut í farangri. Jón Þór segir:
„Í skimun þar sem leitað er í farangri sem fer í lest á flugvélum (þ.e. ekki handfarangri) kom fram mynd af hlut sem líktist handsprengju. Bara til að vera viss þá rýmdum við smá svæði í töskusalnum, þetta kom ekki við sögu hjá farþegum. Af því við þekktum þetta ekki þá fengjum við sprengjusérsveit ríkislögreglustjóra og hingað kom líka sprengjusveit frá Landhelgisgæslunni. Þetta fór farsællega, þetta var bara lögunin á farangrinum. Við höfðum fyrst bara þessa gegnumlýstu mynd og unnum út frá henni. Þar líktist hluturinn ótrúlega mikið handspengju en þegar farangurinn var opnaður og hluturinn færður til þá koma allt annað í ljós. Þetta var bara egglaga hlutur.“
Jón Þór segir að engar tafir hafi orðið á flugi vegna málsins en aðspurður játar hann því að viðbragðsferli lögreglunnar hafi virkað þarna ágætlega. „Það má alltaf skoða og læra og við erum með öryggið á oddinum hérna. Þegar eitthvað svona kemur upp þá virkjum við ákveðið ferli.“