„Það er í raun verið að refsa mér fyrir að vera komin með krabbamein,“ segir kona sem nýlega greindist með krabbamein í hægra brjóstinu. Í ljós kom að konan ber BRCA2-genið sem eykur líkur á krabbameini og er konum í hennar sporum ráðlagt að láta fjarlægja bæði brjóst sín.

Aðgerðir sem þessar, þar sem brjóst eru fjarlægð í forvarnarskyni ef svo má segja, er greiddar af Sjúkratryggingum Íslands. En þar sem konan hafði þegar greinst með krabbamein í hægra brjóstinu náði greiðsluþátttakan aðeins til heilbrigða brjóstsins.

Fjallað er um málið í Morgunblaðinu í dag.

Í fréttinni kemur fram að konan hafi fengið þau skilaboð frá læknum að láta fjarlægja bæði brjóst sín. Að skilja annað brjóstið eftir, verandi arfberi BRCA2, væri eins og að vera með tifandi tímasprengju inni í sér.

Konan leitaði álits Kristjáns Skúla Ásgeirssonar sem hefur sérhæft sig í brjóstnámi og -uppbyggingu. Hann starfar á Klíníkinni í Ármálunum en einnig á brjóstamiðstöðinni í Nottingham á Englandi. Að því er fram kemur í frétt blaðsins spurði konan hvernig greiðsluþátttöku yrði háttað ef hún léti gera aðgerðina erlendis. Fékk hún þau skilaboð að þá yrði kostnaður greiddur að fullu, en hún þyrfti sjálf að bera kostnað af ferðalaginu til Englands.

Konan furðar sig á greiðsluþátttökukerfinu hér á landi og segir þetta dæmi mjög skrýtna birtingarmynd þess.

„Þetta er sami læknirinn, sama aðgerðin og ég fékk að vita hjá Sjúkratryggingum að aðgerðin kostaði það sama fyrir ríkið, hvar sem hún er gerð. Það eina sem er öðruvísi er að ég þarf að leggja talsvert á mig til a fara erlendis í aðgerðina.“

Konan fór í aðgerðina í Nottingham í gær og þarf að dvelja á sjúkrahúsi í nokkra daga áður en hún getur haldið heim á leið. „Ég hefði svo gjarnan vilja hafa losnað við það og fara í aðgerðina í Klíníkinni þar sem ég hefði getað fengið að bjóta stuðnings vina og ættingja,“ segir konan.