Íslenskir feðgar, faðir og fimmtán ára sonur hans, lentu í heldur óhugnanlegu atviki á Tenerife nýlega þegar þeim var byrlað ólyfjan og þeir rændir. Í nýjasta tölublaði Mannlífs er rætt við föðurinn en hann vildi ekki koma fram undir nafni af tillitssemi við son sinn.
Á dögunum sagði Hún.is frá umræddu atviki og fjallaði DV um málið í kjölfarið. Á þeim tíma vildu feðgarnir ekki ræða málið en staðfestu þó að þeir hefðu orðið fyrir hryllilegri reynslu.
Í viðtalinu við Mannlíf segir faðirinn að þetta hafi verið ósköp venjulegur dagur þegar þeir feðgar ákváðu að tylla sér á matsölustað eftir að hafa verið á ströndinni. Þeir gengu eftir götu sem heitir Veronicas en þar eru meðal annars skemmtistaðir og matsölustaðir. Feðgarnir pöntuðu sér gosdrykki og keyptu gleraugu af götusala beint fyrir framan staðinn. Svo settust þeir og fengu sér sopa af drykkjunum en þá má segja að matröðin hafi byrjað fyrir alvöru.
„Þegar við höfðum fengið okkur sopa af drykkjunum þá munum við ekki eftir að hafa lagt glösin aftur niður og það verður bara allt svart í minninu. Við munum þó báðir eftir fjólubláu ljósi þar sem við liggjum á dýnum,“ segir hann og bætir við að hvorugur þeirra feðga hafi getað hreyft legg né lið.
Um fjórar klukkustundir liðu þar til feðgarnir komust aftur til meðvitundar en þá hafði þeim verið komið fyrir bakvið ruslagám. Búið var að taka af þeim um 80 þúsund krónur í peningum, greiðslukort og síma. Eðlilega voru feðgarnir ringlaðir þegar þeir komust til meðvitundar.
Lögregla var kölluð á vettvang en á sjúkrahúsi var staðfest með blóðprufu að feðgunum hafði verið byrlað ólyfjan. Lögregla taldi að feðgunum hafi verið byrlað eitur sem heitir burundanga, sem einnig er stundum kallað „Andardráttur djöfulsins“. Segir faðirinn að lögregla hafi tekið málið alvarlega.
Faðirinn segir að Sigvaldi Kaldalóns, betur þekktur sem Svali, og Halla Birgisdóttir, fararstjórar hjá VITA, hafi reynst feðgunum vel og komið þeim til aðstoðar eftir atvikið. Í samtali við Mannlíf hefur Sigvaldi eftir lögreglu að árásir af þessu tagi séu ekki óalgengar á umræddu svæði en hann hafi þó ekki heyrt af samskonar árásum á Íslendinga. „Lögreglu þótti mjög líklegt að árásin á feðgana tengdist rúmensku mafíunni,“ segir hann.
Nýjasta tölublað Mannlífs.
