Inga Sæland, formaður Flokks Fólksins, lagði leið sína í Iðufell til Fjölskylduhjálpar í dag til að vera viðstödd páskaúthlutun í hádeginu. Að hennar sögn voru aðilar þegar farnir að bíða fyrir utan húsnæðið klukkustund áður en úthlutunin átti að hefjast, og ljóst að margir eiga um sárt að binda.
Hún tók þó eftir því að engin páskaegg voru í úthlutuninni.
„Núna er ég á leið í Fjölskylduhjálp Íslands þar sem borgarfulltrúinn okkar Ásgerður Jóna heldur áfram að hjálpa fólkinu okkar sem á bágt,“ segir Inga í myndbandi á Facebook síðu sinni þar sem hún er á leið til að vera viðstödd páskaúthlutunina.
„Það er verið að leggja sitt af mörkum til að gera þetta sem veglegast og best og almennt er ekkert hér nema þakklæti og auðmýkt gagnvart þeim góðu verkum.“
Inga sýnir frá fjölbreyttu úrvali matvæla sem var úthlutað í ár, fiskur, kjötfars, snakk, eftirréttarpizza, grænmeti – bæði ferskt og frosið -, mjólkurvörur, djús og gos, svo nokkur dæmi séu tekin. Hún tekur þó fram að þetta sé aðeins brot af því sem standi gestum fjölskylduhjálpar til boða í ár. Þó tók hún eftir einu sem var áberandi fjarverandi í úthlutninni. Sjálf páskaeggin.
„Því miður er enginn páskaeggjaframleiðandi hér sem hefur séð ástæðu til þess að úthluta hér páskaeggjum til fátækra barna. Mörg þeirra fá ekkert páskaegg. Burtséð frá hollustunni þá hefur það alltaf verið ákveðin stemming, eins og við vitum, að fá páskaegg á páskadag. En kannski næst. Kannski næst verður einhver svo góður páskaeggjaframleiðandinn að vilja gefa fátækum börnum páskaegg í tilefni páskanna.“
