Sumir spáðu því eftir að Sigríður Andersen sagði af sér nú hlyti tími Brynjar Níelssonar vera kominn. Sú varð ekki raunin og var nú síðdegis tilkynnt að Þórdís Kolbrún Gylfadóttir tæki við dómsmálunum.
Brynjar spyr á Facebook-síðu sinni nú hvers vegna hann sé oft talinn umdeildur. „Þekktur fjölmiðlamaður skrifaði einhvers staðar að ég væri býsna umdeildur maður. En hvernig verða menn umdeildir? Verða menn umdeildir ef þeir viðra skoðanir sínar eða að skoðanir samrýmist ekki í öllu við pólitíska rétthugsun hverju sinni. Sjálfur hef ég alltaf haldið að þeir sem væru fastir í pólitískri rétthugsun og því ofstæki sem henni fylgir væru frekar umdeildir en hinir,“ skrifar Brynjar.
Hann segir enn fremur að varla telji fólk hann ofstækismann. „Varla halda margir því fram að ég hafi öfgafullar skoðanir eða sé ofstækismaður í eðli mínu og þess vegna umdeildur. Er þetta kannski bara góð aðferð hjá fjölmiðlamönnum til að sá tortryggni og efasemdum um pólitíska andstæðinga sína?,“ spyr Brynjar.
Einn Facebook-vinur hans bendir honum á að hann sé í það minnsta nógu umdeildur til að hann hafi ekki orðið dómsmálaráðherra, þrátt fyrir að geta vel valdið því. Því svarar Brynjar: „Stundum snýst þetta kannski um kyn eða að eiga eiginkonu sem er til vandræða.“ En þar vísar hann til þess að eiginkona hans, Arnfríður Einarsdóttir, hafi verið tekin fram fyrir aðra hæfari og skipuð dómari við Landsrétt.