Fjölskylda frá Afganistan sem flúði hingað frá Grikklandi, bíður nú þess að verða send aftur til Grikklands. Um er að ræða konu og tvö börn hennar en faðir barnanna er týndur í Grikklandi. Útlendingastofnun hefur hafnað því að taka mál fjölskyldunnar til efnislegrar meðferðar og kærunefnd útlendingamála hefur staðfest þá ákvörðun. Er því ljóst að fjölskyldan verður send til Grikklands á næstunni.
Eldra barnið er stúlka að nafni Zainab Safari og stundar hún nám í Hagaskóla. Þar hefur henni vegnað vel og hefur nú Réttindaráð Hagaskóla, sem skipað er nokkrum nemendum, kennurum og einu foreldri, ályktað gegn brottflutningnum og biður stúlkunni griða.
Í ályktun ráðsins sem birt er á heimasíðu Hagaskóla kemur fram að Zainab líði vel í Hagaskóla og nemendur og starfsfólk styðji við bak hennar. Ályktunin er eftirfarandi:
Zainab Safari er nemandi í 9. bekk í Hagaskóla. Hún kom til Íslands við upphaf yfirstandandi skólaárs eftir að hafa dvalið í flóttamannabúðum í Grikklandi. Zainab er frá Afganistan. Á fundi réttindaráðs Hagaskóla miðvikudaginn 6. mars 2019 kom til umræðu mál Zainab en hún og fjölskylda hennar fengu þær upplýsingar í vikunni fyrir fundinn að þau fengju ekki dvalarleyfi á Íslandi og yrðu send aftur til Grikklands. Zainab vill vera áfram á Íslandi. Hún er í góðum bekk í Hagaskóla og líður vel með nemendum og starfsmönnum sem styðja við bak hennar.
Zainab er ekki nema 14 ára gömul en hefur þurft að ganga í gegnum hluti sem ekkert barn eða fullorðinn einstaklingur ætti að þurfa að ganga í gegnum. Réttindaráð Hagaskóla mótmælir harðlega þeim áformum að vísa Zainab og fjölskyldu hennar úr landi, út í óvissu sem hræðir fjölskylduna mjög. Ísland er aðili að Barnasáttmála Sameinuðu þjóðanna. Sáttmálinn hefur verið lögleiddur á Íslandi en samkvæmt 3. grein skulu yfirvöld taka allar ákvarðanir er varða börn með hagsmuni barna að leiðarljósi. Það sem barninu er fyrir bestu á að ráða. Einnig fjallar Barnasáttmálinn um rétt barna til góðra lífsskilyrða (grein 27), vernd gegn ofbeldi (grein 18) og rétt til menntunar (grein 28), svo dæmi séu nefnd. Við skorum á stjórnvöld að taka tillit til Barnasáttmála Sameinuðu þjóðanna við ákvörðun sína.
Fjallað er um mál fjölskyldunnar á Stundinni og kemur þar fram að hún er örsnauð og aðstæður flóttamanna í Grikklandi þangað sem fólkið verður sent séu skelfilegar.
