Plötusnúðurinn Jóhannes B. Bjarnason, betur þekktur sem Gullfoss eða Jói B., er bálreiður út í Strætó á Twitter. Hann fordæmdir harðlega hegðun vagnstjóra sem henti syni hans út, einungis vegna þess að myndavélin í síma hans virkaði ekki. Strætó hefur brugðist við og biðst afsökunar á þessu.

„Halló @straetobs – Sonur minn lenti í að myndavélin á símanum hans virkaði ekki og var að hringa í mig grátandi því vagnstjórinn ykkar henti honum út og sagði honum bara að labba. Hann er með árskort hjá ykkur í símanum og ég get ekki séð hversu bættari þið eruð með að fá mynd. Mér finnst EKKI í lagi að henda 11 ára gömlu barni útur vagni hjá ykkur útaf einhverri fáránlegri virkni í appinu ykkar, hann er með gilt kort, og er með símann og það á að vera fjandans nóg til að sýna að hann sé valid farþegi,“ skrifar Jói.

Hann bætir við að þetta sé raunar fáránlegt kerfi hjá Strætó. „Ég kemst bæði inn í bankann minn, og fyrirtækjabankann án þess að þurfa að nota myndavélina og ætti fjandakornið að geta komist í strætó. Svona fyrir utan það að mér finnst að krakkar sem ekki eiga þess kost að keyra sjálf eigi bara að fá ókeypis í strætó – væri einfaldasta leiðin til að venja fólk við almenningssamgöngur,“ skrifar Jói. Ástæðan fyrir myndavélinni ku vera sú að þannig er síður hægt að falsa appið.

Líkt og fyrr segir hefur Strætó brugðist við þessu. „Góðan dag. Við viljum að vagnstjórar sýni ákveðna tilitssemi ef tækniörðugleikar eru að valda fólki vandræðum í appinu. Sérstaklega þegar að börn eiga í hlut. Við viljum biðja þig og son þinn innilega afsökunar á þessari framkomu. Við munum ræða við þennan tiltekna vagnstjóra,“ segir í svari Strætó.

Halló @straetobs – Sonur minn lenti í að myndavélin á símanum hans virkaði ekki og var að hringa í mig grátandi því vagnstjórinn ykkar henti honum út og sagði honum bara að labba.

Hann er með árskort hjá ykkur í símanum og ég get ekki séð hversu bættari þið eruð með að fá mynd

— jói b (@joibjarna) February 20, 2019