Sitthvað var skráð í dagbók lögreglunnar á höfuðborgarsvæðinu í gærkvöldi og -nótt. Á Seltjarnarnesi voru afskipti höfð af ofurölvi manni á veitingastað um hálf sjö. Maðurinn gat ekki greitt fyrir veitingar sem hann hafði fengið afgreiddar og var hann handtekinn sökum ástands.  Maðurinn var vistaður í fangageymslu lögreglu grunaður um fjársvik og hótanir gegn lögreglu.

Um og upp úr tíu í gærkvöldi voru nokkrir ökumenn stöðvaðir grunaðir um ölvun við akstur. Einnig voru skráningarnúmer klippt af tveimur bílum.

Rétt fyrir ellefu var lögreglan kölluð út vegna slyss í verslun í efra Breiðholti. Maður þar inni fékk flog, féll aftur fyrir sig og braut rúðu í hurð. Maðurinn fékk sár á hnakka og var mikil blæðing, en maðurinn var fluttur á sjúkrahús til aðhlynningar.

Rétt fyrir ellefu hafði lögregla afskipti af íbúð í fjölbýlishúsi í Grafarholti. Einn var kærður fyrir vörslu fíkniefna. Rúmlega tvö í nótt var óskað eftir aðstoð lögreglu á hótel í miðbæ Reykjavíkur. Þar var maður, sem var ekki gestur, sem vildi ekki yfirgefa hótelið. Við afskipti lögreglu af manninum fundust ætluð fíkniefni hjá manninum og er hann kærður fyrir vörslu fíkniefna.