Dómstóll í Los Angeles í Bandaríkjunum er nú með til meðferðar stefnu Jóhanns Helgasonar vegna meints lagastuldar á laginu Söknuði eftir Jóhann. Rolf Løvland, lagahöfundur, og Brendan Graham, textahöfundur, hafa ekki brugðist við stefnu Jóhanns en þeir eru skráðir höfundar lags og texta „You Raise Me Up“ sem Jóhann telur vera stolna útgáfu af Söknuði.

Lögmaður Jóhanns krefst þess því að dæmd verði útivist í málinu. Fréttablaðið skýrir frá þessu. útivistardómur hefur í för með sér að meðferð málsins mun halda áfram fyrir dómi þótt Løvland og Graham hafi ekki gripið til varna. Blaðið hefur eftir Jóhanni að það komi honum á óvart að Løvland hafi ekki brugðist við stefnunni, varla sé það kostnaðurinn sem hann er að horfa í en „You Raise Me Up“ hefur verið sagt það lag sem hefur aflað einna mestra tekna í gegnum tíðina.

Í kröfu lögmanns Jóhanns er bent á að Løvland hafi tvisvar neitað að taka við stefnu í málinu og hafi honum á endanum verið stefnt í samræmi við Haag-sáttmálann þann 21. ágúst síðastliðinn og Graham þann 8. apríl. Báðum hafi þeim því verið stefnt á löglegan hátt. Lögmaðurinn segir í kröfunni að hann telji það vera ásetning Løvland og Graham að hafa ekki brugðist við stefnunni.

Málarekstur Jóhanns gegn tónlistarfyrirtækjum, sem tengjast málinu, mun halda áfram þótt dómari fallist á kröfuna um útivistardóm því fyrirtækin hafa gripið til varna.