Samtök fyrirtækja í sjávarútvegi – SFS – vilja undirstrika að stefna félagsins er að félagar fari ávallt að lögum og reglum og gildir þá einu í hvaða landi starfsemin fer fram. Samtökin kalla eftir rannsókn á máli Samherja sem hefur verið sakaður um að greiða mútur í Namibíu til að komast yfir fiskveiðikvóta.

Ályktun SFS vegna málsins er eftirfarandi:

„Samtök fyrirtækja í sjávarútvegi vilja taka fram vegna umræðu um starfsemi Samherja hf. í Afríku, að það hefur ætíð verið afstaða samtakanna að allir félagsmenn skuli fara að lögum og eftir reglum. Gildir þá einu hvar viðkomandi starfsemi fer fram, á Íslandi eða í útlöndum.

Hvað varðar framkomnar ásakanir á hendur Samherja hf., þá eru þær í eðli sínu alvarlegar og það er fyrirtækisins að bregðast við þeim. Ljóst er að mál af þessu tagi getur haft áhrif á orðspor íslensks sjávarútvegs og stöðu á alþjóðlegum markaði. Því er brýnt að málið verði rannsakað og hið rétta komi fram. Það er allra hagur, ekki síst þeirra sem bornir eru þungum sökum.“

Undir þetta skrifar Heiðrún Lind Marteinsdóttir, framkvæmdastjóri SFS.