Um hálf fjögur í nótt var maður handtekinn á skemmtistað í miðbænum grunaður um að hafa kastað glasi í höfuð annars. Þegar lögregla hafði afskipti af manninum sagðist hann hafa tekið nokkur ár í lögfræði og taldi sér ekki skylt að segja til nafns. Hann var færður á lögreglustöð þar sem hann gisti í fangaklefa. Þetta kom fram í dagbók lögreglu.

Samkvæmt lögreglu var nóttin annars róleg, aðeins laganeminn dvaldi í fangageymslu framan af nóttu.

Þó var töluvert um ölvun í miðbænum og þurfti lögregla að hafa afskipti af börnum undir 18 ára aldri. Þau voru færð á lögreglustöð þar sem þau voru sótt af forráðamönnum.

Annars fólust verkefni lögreglu í nótt að mestu í því að hafa afskipti af ökumönnum undir áhrifum áfengis og fíkniefna. Var einn þeirra að sögn lögreglu áberandi ölvaður.