Kveðinn var upp dómur í Héraðsdómi Reykjavíkur í gær yfir manni sem var sakaður um að hafa í félagi við annan mann ráðist á mann fyrir utan Björnsbakarí við Austurströnd á Seltjarnarnesi, fyrir rúmum tveimur árum, eða 5. ágúst 2017. Maðurinn var sleginn með einu höggi með krepptum hnefa í andlitið, þeir héldu honum föstum og slógu hann í andlitið með hnúajárni, einu  höggi, í hægra gagnaugað, með þeim afleiðingum að maðurinn hlaut bólgu og mar yfir neðra hægra augnloki, blæðingu undir slímhúð hvítunnar á hægra auga, mar út á hægra gagnauga og sár við vinstri augnkrók.

Maðurinn var einnig ákærður fyrir nokkur þjófnaðarbrot, meðal annars að hafa tekið bíl ófrjálsri hendi. Einnig fyrir umferðarlagabrot.

Maðurinn játaði brot sín skýlaust eins og þau eru framsett í ákærum.

Hlaut hann sex mánaða skilorðsbundið fangelsi og skal greiða málsvarnarlaun og annan sakarlkostnað upp á rúmlega 160 þúsund krónur.