Lögreglan á höfuðborgarsvæðinu fékk tilkynningu um að ráðist hefði verið á unglinga við Salaskóla í Kópavogi í gærkvöldi. Að sögn tilkynnanda voru hafnaboltakylfur, hnífar og hnúajárn á lofti. Í tilkynningu kemur fram að málið sé í rannsókn en engar frekari upplýsingar eru gefnar upp í skeyti sem lögregla sendi frá sér.

Lögreglu barst einnig tilkynning um að fólk hefði ráðist að húsi í Kópavogi í gærkvöldi. Lögregla var send á staðinn en ekki kemur fram hvort einhver hafi verið handtekinn eða hvort einhverjar skemmdir hafi verið unnar á húsinu. Lögregla handtók svo einstaklinga fyrir þjófnað í verslun á Nýbýlavegi.

Bifhjólamaður var staðinn að ofsaakstri í Ártúnsbrekku á ellefta tímanum í gærkvöldi, en hjól mannsins mældist á 140 kílómetra hraða. Hámarkshraði þarna er 80 kílómetrar á klukkustund.