Lögregla ætlar að fara fram á áframhaldandi gæsluvarðhald og einangrun yfir lettneskum manni sem tekinn var með 700 grömm af kókaíni innvortis. Maðurinn kom hingað til lands frá Madrid á Spáni þann 1. september en gæsluvarðhald hans rennur út í dag.

Í frétt mbl.is af málinu segir Jón Halldór Sigurðsosn, lögreglufulltrúi hjá rannsóknardeild lögreglunnar á Suðurnesjum, að rannsókn málsins sé í fullum gangi, ekki á byrjunarstigi og ekki lokastigi.

Guðmundur Ingi Þórodsson, formaður Afstöðu, félags fanga, setur sig upp á móti þessum áformum. Hann deilir frétt Morgunblaðsins á Facebook og segir beiðni um einangrun vera frekju og misnotkun á heimildum lögreglu. Þá segir hann að lögreglan á Suðurnesjum hafi lítið sem ekkert gert í málinu undanfarna viku:

„Ég gæti skilið lengra gæsluvarðhald fyrir lausagæslu en að biðja um áframhaldandi einangrun er algjört rugl og frekja og misnotkun á heimildum lögreglu. Lögreglan hefur nú þegar haft hann í eina viku í einangrun sem er nægur tími til rannsókna. Ef þeir eru að bíða eftir svörum frá Spáni hefðu þeir alveg eins getað farið fram á árs einangrun, Þetta er ekki forgangsmál á Spáni og sýnir að lögreglan á Reykjanesi hefur lítið sem ekkert gert á þessari viku. Lögreglan verður að hætta að misnota sínar heimildir og dómstólar að leggja blessun sína yfir þær. Áfram með smjörið!“