Árni Valur Sólonsson, hótelstjóri, sakar Eflingu um bull og lygar og segir þá skipta sér af málum sem komi þeim ekki við. Frá þessu er greint í Fréttablaðinu.

Fyrr í dag var greint frá ávirðingum Eflingar gegn Árna sökum úrslitakosta sem starfsmönnum hefðu verið settir og hátterni hans kallað fullkomlega siðlaust.

Þetta er eitthvað sem kemur Eflingu ekkert við. Ég er að borga meira en það sem þeir hafa samið um, sagði Árni í samtali við Fréttablaðið. Segist hann greiða sínu starfsfólki rúmlega 50 þúsund krónum hærra kaup en kveðið er á um í kjarasamningi.

Aðgerðirnar sem Efling vísar í hafi verið uppsögn á launaliði í samningi starfsfólksins, en slíkt sé fullkomlega löglegt og gert í samráði við lögmann Samtaka atvinnulífsins.

„Það hefur engum verið sagt upp hjá mér. Ég er að borga langbestu launin fyrir þessi störf í bænum. Ég er bara að segja upp launaliðnum, sem sagt því sem ég er að borga umfram taxta.“

Árni segir engan hafa sagt upp vegna aðgerðanna og að sama bragði hafi engum verið sagt upp störfum. Telur hann að formanni  Eflingar, Sólveigu Önnu Jónsdóttur, gangi það eitt til að vekja athygli á sjálfri sér og stofna til verkfalla.

„Ef hún hefði nennt að hlusta á mig áður en hún fór í verkföllin þá hefði hún nú varla farið í verkföll, vegna þess ég er að yfirborga launin hjá starfsfólkinu mínu.“

„Vegna þess að það er vel borgað hjá mér og fólkinu líður vel í vinnu þangað til hún kom þessi kelling þarna, kommúnistinn, til valda hjá Eflingu.“

„Ekki hefur hún haft fyrir því að koma í eitt einasta skipti og kynna þessa nýju samninga fyrir starfsfólkinu. Vegna þess að hún hafi enga ástæðu til þess, greinilega. Hún vill bara fara í verkfall. Það eina sem henni gengur til er að vekja athygli á sjálfri sér.“