Ljóst er að fólki blöskrar allverulega auglýsing leigusala í Kópavogi innan hópsins Leiga á Íslandi en þar býður Tryggvi nokkur Magnússon 15 fermetra herbergi til leigu á 70 þúsund krónur. Tryggvi er fordæmdur í athugasemdum og spurt hvað sé eiginlega að honum.
Tryggvi auglýsir „íbúðina“ á ensku og segir hita og rafmagn innifalið en ekkert internet. Af myndum að dæma er „íbúðin“ mjög þröng, sturta er inni í miðju rýminu og þar er klósettið jafnframt. Sumir grínast í athugasemdum við auglýsinguna að það sé þó þægt að spara í innkaupum á klósettpappír.
„Ég er nú ekki vanur að kvarta yfir svona löguðu en hversu vandræðalegt væri það ef vinur manns kæmi í heimsókn og þyrfti að kúka. Honum yrði svo bara sagt að fara í sturtuna meðan ég sæti á sófanum hliðin á honum með einungis þunnt hengi á milli okkar,“ segir einn maður í athugasemd.
Í athugasemdum er auglýsingin gagnrýnd harðlega. „Hvers konar manneskja ertu að leigja þetta. Fangelsi eru betri á Íslandi,“ segir einn maður. Annar spyr: „Úr hvaða hryllingsmynd eru þessar myndir?“ Ein kona tekur undir og segir þetta frábært verð fyrir „morðkjallara“.
Sá þriðji spyr: „Varð þér eitthvað illt af í æsku?“ Annar maður segir svo: „Þetta hlýtur að vera spaug?“ Anthony nokkur segir þetta einfaldlega sturlaða græðgi. „Þetta er fokking ógeðslegt. Þetta er ekki íbúð. Finndu orðabók og flettu upp „íbúð“, flettu svo upp „skáp“. Þar ætti að standa: „gráðugur leigusali vill leigja skáp á fúlgu fjár.“ Þetta er ógeð.“
DV reyndi að ná tali af Tryggva leigusala án árangurs.