Fyrrverandi starfsmaður Facebook hefur höfðað mál á hendur samskiptamiðlarisanum fyrir að hafa valdið sér áfallastreituröskun. Selina Scola starfaði í höfuðstöðvum fyrirtækisins í Kaliforníu í níu mánuði við að fara í gengum færslur sem aðrir notendur höfðu tilkynnt.

„Á hverjum degi birta notendur Facebook milljónum myndbanda af barnaníði, nauðgunum, pyntingum, dýraníði, afhöfðunum, sjálfsvígum og morðum,“ segir í greinargerð Scola. Þar segir einnig að Facebook treysti á starfsfólk eins og Scola til að sía út slíkt efni af samfélagsmiðlinum. Hún og samstarfsmenn sínir skoði að meðaltali 10 milljón slíkar færslur í hverri viku og magnið sé slíkt að hún þjáist af áfallastreituröskun. Byggir málssóknin að miklu leyti á að Facebook hafi ekki tryggt að starfsfólkið fái ekki sálfræðiþjónustu.

Segir í greinargerðinni, sem bandarískir fjölmiðlar greina frá í dag, að Scola sé með það mikla áfallastreituröskun að hún geti ekki snert tölvumús eða farið inn í kalda byggingu þar sem hún hafi verið „látin stara á barnaklám, pyntingar og morð allan daginn“. Facebook hefur ekki viljað tjá sig um málið.