„Það má eiginlega segja að íslenska sumarið sé komið í langt sumarfrí.“ Þetta segir Páll Bergþórsson, elsti veðurfræðingur landsins. Hann og fleiri veðurfræðingar segja í samtali við DV að veðrið eigi eftir að versna og spá þeir aðeins rok og rigningu í júlí. Um hreina dómsdagspá er að ræða og vildi einn veðurfræðingur ekki koma fram undir nafni en það væri samdóma álit flestra veðurfræðinga að höfuðborgarbúar ættu ekki von á góðu. Var tóninn slíkur að mætti allt eins búast við því að það myndi rigna eld og brennisteini. Að flytja tíðindi af veðri er vanþakklátt starf og fá veðurfræðingar oft skömm í hattinn. Nú er staðan sú að veðurfræðingar óttast hreinlega að koma fram undir nafni og flytja Íslendingum fregnir af því veðurfari sem sé framundan.

Páll telur ólíklegt að komandi mánuður samanstandi af öðru en raka og úrkomu þó verði að öllum líkindum bjart og fallegt fyrir vestan með köflum. Haraldur Eiríksson veðurfræðingur hjá Veðurstofu Íslands staðfestir að mestar líkur séu á rigningu og roki meirihluta júlí. Ferðahelgin mikla þann 6.-8. júlí, verður líklega mjög blaut þetta árið.

Haraldur segir að helst megi baða sig í sól á Austurlandi. Veðurfræðingur sem vildi ekki koma fram undir nafni segir útlitið ömurlegt.

„Þetta lítur alls ekki vel út en ég vona að sjálfsögðu að ég hafi rangt fyrir mér,“ segir veðurfræðingurinn nafnlausi og bendir á að sú eina sól sem hefur skinið á höfuðborgarsvæðinu í sumar er íslenska landsliðið í knattspyrnu. Nú er því sólskini lokið eftir tap gegn Króatíu. Fram undan er rok og rigning, ömurlegt veður.