Öræfajökull er nú í gjörgæslu jarðvísindamanna en auk hans eru Hekla, Katla, Grímsvötn og Bárðarbunga undir sérstöku eftirliti en eldstöðvarnar sýna allar merki þess að þær séu að undirbúa sig undir gos. Nýlega æfðu vísindamenn, Almannavarnir og flugumferðarstjórar viðbrögð við gosi í Öræfajökli út frá þeirri sviðsmynd að aska hefði dreifst til Kanada og Evrópu.

Morgunblaðið skýrir frá þessu og hefur eftir Kristínu Jónsdóttur, hópstjóra náttúruvárvöktunar Veðurstofunnar, að Öræfajökull sé í gjörgæslu. Haft er eftir henni að sífellt fullkomnari mælitæki séu notuð til að vakta landið og sérfræðingar í náttúruvá séu á vakt allan sólarhringinn auk veðurfræðinga. Fylgst sé með jarðskjálftum, eldfjöllum, rennsli í ám og vötnum og snjóflóðahættu.

Haft er eftir Kristínu að skjálfti upp á 3,15 í Grímsvötnum þann 23. nóvember hafi sett vísindamenn í stellingar því skjálftar af þessum styrkleika hafi ekki komið nema í aðdraganda eldgosa. Þetta hafi verið ágæt áminning um að gos geti brotist fyrirvaralítið út í Grímsvötnum enda sé skammt niður í kvikuhólfið.

30 mælitæki eru nú við Heklu og líða aðeins fimm sekúndur frá skjálfta þar til upplýsingar þar um birtast á skjá á Veðurstofunni. Einnig fara viðvörunarkerfi í gang við ýmsar mismunandi aðstæður eins og ef margir litlir skjálftar verða á stuttum tíma á afmörkuðu svæði. Vonast er til að hægt verði að sjá óróleika í eldfjallinu með lengri fyrirvara en hefur verið hægt til þessa.