Enn hefur ekkert spurst til Mohammed Dewji, sem kallaður hefur verið yngsti milljarðamæringur Afríku, en Dewji var rænt af vopnuðum mönnum í heimalandi sínu, Tansaníu, fyrir helgi.

Það var á fimmtudag sem vopnaðir menn rændu Dewji í Dar es Salaam, höfuðborg landsins, en Dewji var á leið út af líkamsræktarstöð. Engir lífverðir voru með í för og sögðust vitni hafa séð menn skjóta úr byssu upp í loftið um það leyti sem Dewji var leiddur burt.

Dewji hefur sem fyrr segir stundum verið nefndur yngsti milljarðamæringur Afríku en hann er 43 ára og eru eignir hans metnar á 1,5 milljarða Bandaríkjadala, rúma 170 milljarða króna á núverandi gengi.

Aðstandendur Dewji hafa boðið hverjum þeim sem hefur upplýsingar um ránið 440 þúsund Bandaríkjadali, rúmar 50 milljónir króna. Lögregla hefur handtekið um tuttugu manns vegna málsins en enn sem komið er hefur Dewji ekki fundist.

Dewji er eigandi og forseti MeTL sem framleiðir allskonar varning í Afríku, þvottaefni og reiðhjól svo tvö dæmi af mörgum séu nefnd. Tuttugu og fjögur þúsund manns starfa fyrir fyrirtækið sem er það stærsta í Tansaníu.

Dewji hét því árið 2016 að láta helming auðæfa sinna renna til góðgerðarmála. Hann er kvæntur þriggja barna faðir og nýtur talsverðra vinsælda í heimalandinu.