Blekkti frægt fólk um allan heim – Pamela Anderson vígð greifynja
Stefan Cernetic, 57 ára maður frá borginni Trieste í austurhluta Ítalíu, hefur verið kærður fyrir skjalafals og að villa á sér heimildum. Samkvæmt blaðinu Republica sagðist maðurinn heita Stefan Tchernetich, krónprins af Svartfjallalandi.
Svikamilla Cernetic var mjög vel undirbúin. Hann réð þjón, sem var í raun samverkamaður hans, og keyrði um á Mercedes Benz bifreið með diplómatískum númeraplötum og skjaldarmerki Svartfjallalands. Hann hélt auk þess uppi heimasíðu fyrir tign sína (mjög lélegri reyndar) þar sem má t.d. finna titla, ættartré, sögu og myndir af honum sjálfum með tignarfólki.
Út á þetta fékk hann fríar ferðir og gistingar víðs vegar um heim og hitti margt frægt fólk. Ein helsta ástæðan fyrir því að þetta gekk upp hjá honum var hversu duglegur hann var að útdeila titlum til fólks sem hann hitti. Baywatch-stjarnan og dýraverndunarsinninn Pamela Anderson var ein af þeim sem féll fyrir gabbinu en Cernetic vígði hana sem greifynju árið 2015 (með sverði og öllu).
Á heimasíðunni má sjá myndir af honum með Alberti fursta af Mónakó, Sheikh Ali bin Al Thani prins af Qatar, háttsettum kardínálum úr Vatíkaninu, Novak Djokovic tennisstjörnu og ýmsum leikurum og rokkstjörnum. Við þetta fólk ræddi hann menningar og efnahagsleg málefni tengd Svartfjallalandi en algerlega umboðslaus.
Cernetic hefur tengingu við Ísland því að Linjie Chou, sem vikið var úr doktorsnámi við viðskiptafræðideild Háskóla Íslands árið 2014, starfaði fyrir hann. Sjá hér.
Nikulás I, síðasti konungur Svartfjallalands, flúði landið árið 1915, mitt í fyrri heimsstyrjöldinni, og þremur árum síðar var konungdæmið aflagt. Núverandi ríkisarfi heitir Nikulás II Petrovic-Njegos, 72 ára arkítekt, sem segist muni taka við krúnunni sé það vilji fólksins.
The latest The HigginsQuiz Daily! https://t.co/Z8NEzgjUJJ #news
— Higginsquiz (@higginsquiz) June 17, 2017