Bandaríska söngkonan Ariana Grande hefur aflýst því sem eftir er af tónleikaferð hennar um Evrópu í kjölfar hryðjuverkaárásarinnar í Manchester í gærkvöldi. Þar létust að minnsta kosti 19 manns og 60 særðust. Grande átti eftir að koma fram á fleiri tónleikum í Englandi og einnig Belgíu, Póllandi, Þýskalandi og Sviss.

Slúðurvefurinn TMZ segist hafa heimildir fyrir að Grande hafi ákveðið að aflýsa tónleikaferðinni. Grande birti færslu á Twitter í nótt þar sem hún sagðist vera gjörsamlega niðurbrotin og algjörlega orðlaus vegna málsins.

Umboðsmaður hennar, Scooter Braun, sagði að Grande og starfsfólk hennar syrgi þá látnu sem hafi látist í þessari huglausu árás.

TMZ segir að Grande og starfsfólk hennar hafi áhyggjur af öryggi í kringum tónleika hennar og auk þess hafi málið fengið svo á Grande að hún sé ekki fær um að koma fram á tónleikum eins og er.