Vísitala leiguverðs á höfuðborgarsvæðinu hefur hækkað um 11,5 prósent á tólf mánaða tímabili frá janúar 2016, en á sama tíma hefur söluverð íbúða á höfuðborgarsvæðinu hækkað um 16,3 prósent.

Þetta kemur fram í nýrri Hagsjá Landsbankans sem fjallar um þróun húsaleigu og kaupverðs.

Í Hagsjá segir að breytingar milli leigu- og kaupverðs fjölbýlis á höfuðborgarsvæðinu hafi fylgst nokkuð náið að allt frá árinu 2011 þegar farið var að birta vísitölu leiguverðs. Breytingar urðu þar á um mitt ár 2015 þegar töluverð lækkun á húsaleigu mældist þannig að vísitala leiguverðs dróst aftur úr vísitölu kaupverðs. Það sama gerðist í fyrravor og hefur þróunin haldið áfram, að því er segir í Hagsjá.

Í dag er staðan sú að kaupverð fjölbýlis hefur hækkað um 10 prósent meira en leiguverð frá ársbyrjun 2011.

Í Hagsjá er einnig fjallað um þróunina á einstökum svæðum á landinu og bent á það að fermetraverð er almennt hærra í minni íbúðum en stærri íbúðum. Þannig er leiguverð fyrir tveggja herbergja íbúðir nær alls staðar hærra en á þriggja herbergja íbúðum ef miðað er við verð á hvern fermetra. Eina undantekningin á þessu er Akureyri þar sem þriggja herbergja íbúðir eru dýrastar að meðaltali.

Þá er bent á það að sumsstaðar sé munurinn verulegur eins og í Kópavogi og austurhluta Reykjavíkur. Munur á leiguverði tveggja og þriggja herbergja íbúða er mestur í Kópavogi, 28 prósent, en er að meðaltali um 13 prósent á öllum svæðum.

Í Hagsjá er einnig fjallað um hvar leiguverð hafi hækkað mest ef miðað er við janúar 2016 og janúar 2017. Mesta breyting á leiguverði á þessum tíma er 25 prósenta hækkun tveggja herbergja íbúða á Suðurnesjum og þar á eftir koma tveggja herbergja íbúðir í Kópavogi. Minnstu breytingarnar eru 14 prósent lækkun á minnstu íbúðunum á Akureyri og um tveggja prósenta hækkun á þriggja herbergja íbúðum í austurhluta Reykjavíkur.